Wo dat bi’t Praktikum um gung

Dat Teel vun’t Praktikum weer, mehr över dat Zentrum, de Spraak, de Arbeit in un för de Allgemeenheit un de Projekte to lehren, de dor tohören, un ok mit mien egen Snacken beter to warrn. In mien Tiet bi dat Zentrum harr ik de Chanc‘ veel verscheden Opgaven un Akschonen to beleven. Ik bün bi en Sitten vun de SHHB-Utschuss, bi de Mitgliederversammeln vun de Plattdüütsche Vereen Viöl, bi en Fortbillen in de Kinnergoorn Siebenstein in Jübek bi ween un, kloor, ok mal in’t Büro.

Blickpunkt: Scholen

Besunners spannend för mi as angahn Schoolmeistersche is de Plattmess an de Grundschool in Langballig ween. Dor hebben sik verscheden Lüüd, de all wat mit School, Kinner un Plattdüütsch to doon hebben, drapen, um sik över Material, Ideen un Ünnerrichtsbispelen uttotuuschen. Dat is bannig spannend ween un ik weer ehrlich begeistert, wat allens op Plattdüütsch so geiht un wo veel schöne un kreative Ideen dat gifft. Ok interessant is de Dag in de Grundschool in Mildstedt ween. Dor hebben wi mit Thomas Sievers un „Pepper“, de Roboter, de Plattdüütsch snackt, de Kinner besöcht. De kunnen Pepper allerlei Fragen op Hoochdüütsch stellen un hebben denn en Anter op Platt kregen. Spannend to sehn weer, wat för ünnerschedliche Fragen de Kinner je na Öller stellen. Dor is allens möögliche mit bi ween: Vun „Hast du eine Mama?“ över „Wie soll das Wetter morgen in Mildstedt werden?“ bit to saaklich Fragen as „Was ist das größte Säugetier der Welt?“.

Blickpunkt: Veranstalten

En Highlight is dat platt drift barcamp ween. Dor geev dat veel vörtobereiden un to organiseren. De Uttuusch bi dat Barcamp is toll ween un de verscheden Sessions sünd grootoordig ween. Ik heff sogor sülven en Session to mien Reis mit de Rucksack dör Südostasien geven.

En annere Highlight weer dat Konzert vun Steffi Steup. Mit Elan gung dat dörch de Avend un dat hett mal wedder wiest wo veel Swung de Plattdüütsche Spraak hett. En Bonus in mien Praktikumstiet weer, dat Lisa Wrogemann as „Plattfluencerin“ (@eat.platt.love) mit dorbi ween is. Mit ehr frischen Ideen inspireert se via Instagram un anner Projekten de Lüüd mehr Plattdüütsch in ehren Alldag to integreern.

Vun achtern bekeken

So lött sik dat allens tosamenfaten: Dörch de Tiet bi Gesa Retzlaff, de Dat Plattdüütsch zentrum stüert, un ehr Nettwark heff ik veel lehrt, över den Wannel in de Snackergrupp, den Spraakutbu un anner Rutföddern för de Regionalspraak. Dörch de Möög vun’t hele Zentrum heff ik tolle Sichten op den plattdüütschen Kulturbedriev un Informatschonen över Platt-Aktivitäten kregen un mien Plattdüütsch snacken is definitiv sekerer worrn.