Stell di bidde kort vör / Stel dek eins kort vor:

Ik bün Fiete un ik kamm ut de Region Hanover in dat Dialektrebeet Oostfalen. Dor bün ik ok groot worrn: in Calenbarg. Un nu maak ik en FSJ (Friewillig Sozjales Johr) bi de Nordsee Akademie. Sünst sünd mien Hobbies wat över Spraken to lehren, Landkoorten digital teknen, Reknerspele spelen un sünst mutt ik wat Nies söken.

Ek bin Fiete un ek kome uut de region Hanauver in dat dialektgebeide Oostvalen. Daar bin ek ook groot eworn: in Kalenbarg. Un nu maak ek ein VSJ (Vrywilliget Socialet Jaar) by de Nordsee Aka‘emy. Süs sind myne intressen aver spraken te leren, landkaarten digitaal te malen, reknerspele te spelen un süs mut ek wat nyet soeken.

Wat bedüüt di de plattdüütsche Spraak? Wat bedui‘ed dek de Sassensprake?

Ik bün nich mit de Plattdüütsche Spraak upwussen un heff nix mit de Spraak to doon hatt. Aver ik kann al twüschen de Niveaus A2/B1 snacken, man dat Schrieven bruukt noch lang. Platt bringt mi en Regionalidentität de binah storven is, man noch to redden is. Dat weer schaad, wenn de Spraak starven dee. Denn weer unse Kultur veel langwieliger. Een kunn sik denn över dat Hoochdüütsche defineren, as de Hanoverschen Lüüd dat maken, man för mi is dat en Versöök sik mit frömde Feddern to smücken, wiel een siene Kultur utlöscht hett. Un mal reell: Dat is nich dat beste Hochdüütsch, sünnern dat langwieligste Hochdüütsch.

Ek bin nich mee de Sassensprake upewassen un hevve nix mee de sprake te daune had. Aver ek kan al twischen de Niveaus A2/B1 kören, man dat schryven bruukt noch lang. Sassisch bringt mek ‘ne regionalidentitet de fast verstorven is, man noch te redden is. Dat sy scha‘e wenne de sprake starvet. Denne sy use kultuur veelst langwyliger. Ein kan sek denne aver dat Hoogduitsche defineren, asse de Hanauverschen lui‘e al daun, man vor mek is dat ein versoek sek mee vroemedden ve‘ern te smücken, ümme dat ein syne kultuur utelöscht het. Un wenne ein uprecht is, denne hevvet wie nich dat beste Hoogduitsch, sünder dat langwyligste Hoogduitsch.

Wo kriggst du hüüttodaags Plattdüütsch mit? Woor belevest du vandage noch Sassisch?

As en junge Person kriggt een in Hanover nix mit. Dor mutt een in’t Internet kieken un dor finnt een ok veel to wenig. Besünners in Oostfälisch finnt een bloot Rolf Ahlers vun de Brunswieksche Landschop un de Böker, de dor verapenlicht warrn. Sünst kann ik de Low Saxon / Low German Discord Server nömen, woneem sik Lüüd vun dat hele Dialektrebeet ünnerholen un vun emme Projekten un Foortgangen vertellen.

As ‘ne junge person belevet ein in Hanauver nix daarvun. Daar mut ein in’t internette kyken un daar vinned ein ook vele tau weinig. Besünders vor Oostvalen vinned ein bloot Rolf Ahlers vun de Brunswyksche landschup un de boeker de daar verapentligt word. Süs kan ek de Low Saxon / Low German Discord server nennen woor sek lui‘e vun dat heile dialektgebei‘e uutwesseled un vun öre projeken un vordgangen vertellet.

Wie hest du de Vereen kennenlehrt? Wo hest du de Verein kennenelered?

Ik woll de Spraak immersiv lehren un dorför heff ik Plattdüütsche Zentren söcht un denn en Zentrum neeg bi Kiel funnen un heff denn Gesa anschreven. För dat Zentrum, man mehr för de Spraak, will ik mehr immersives Material in’t internet stellen, dormit dat Lehren vun Plattdüütsch eenfacher warrt.

Ek wol de sprake immersyf leren un daarvor harre ek platduitsche centren esoekt un denne ein centrum in de neegde vun Kyl efunnen un hevve denne Gesa aneschryven. Vor dat centrum, man meer vor de sprake, wel ek meer immersyvet matrial in’t internet stellen, daarmee dat leren vun Sassisk lichter wert.

Wat wünscht du di för de plattdüütsche Spraak? Wat wünschest du dek vor de Sassensprake?

De Sprekerslüüd schöllen tosamenwassen un nich jümmers up emme Dialekt pucken un annere Lüüd nich verstahn wüllen, wenn se en Woort anners seggen. Dorto höört ok dat Tosamenarbeiden mit de Nedersaksies-Spreker in de Nederlanne. Wi schölen tosamen de Spraak vöranbringen un besünners in de süüdliche Dialektrebeten sichtbor warrn. Un dorum wünsch ik mi en Schriefwies för all Dialekten, man dat gift dor ok veel Vischonen.

De sprekerslui‘e schöllet tehope wassen un nich jümmers up öre dialekt puchen un andere lui‘e nich verstaan wellen, wenne sei ein word anders segget. Daartau ehoert ook dat tesamenwarken mee de Sassischen dialekten in de Ne‘erlannen. Wi schöllet tehope de sprake voran bringen und besünder in de suidlige dialektgebeid sichtlig weren. Un daarup wünsk ek mek ein schryfwyse vor elke dialekten, man daar gift dat ook vele visionen.

Hest du en plattdüütschen „Lieblingsminschen“? Hest du ein Sassischen/Platduitschen leifsten minsch?

Natürlich kann ik mit Gesa anfangen. Se is so en hartliche Minsch un belangt sik för de Interessen vun ehr Mitminschen. Danke för dien Insetten för de Spraak.
Denn gift’t ok de Lüüd, de sik överdialektal vör de spraak insetten.
Opletzt sünd Lüüd to nömen, de nie'e Spraakbispelen schapen, as Schrieverslüüd up de Plattdüütsche Wikipedia un dat Nedersaksies Wikipedia. Dorto gifft dat Lüüd up de sotschalen Medien, as Wearldspråke oder eat.platt.love un so velen mehr.

Natuirlig kan ek mee de Gesa anvangen. Sei is so ein hartlige minsch un belangt sek vor de intressen vun öre meeminschen. Danke vor dyn insettend vor de sprake.
Denne gift‘t ook de lui‘e, de sek averregional vor de sprake insettet.
Terlest sind lui‘e te nennen de nye spraakbyspele schapet, wo schryverslui‘e by de Platduitsche Wikipedia un dat Nedersaksies Wikipedia. Daartau gift dat lui‘e up de sociale medien, wo Wearldspråke or Eat Platt Love un mannig meer.