platt.best - Drift vun Harten

Drift vun Harten

Logo Platt Best - Dirft vun Harten

Winter in de
LĂŒtthasenschool Audio

Wokeen kennt nich dat wunnerbore ole Kinnerbook „Die HĂ€schenschule“? De Geschichten vun de lĂŒtten Hasenkinner in de Hasenschool sĂŒnd to ĂŒm to sööt. Albert Sixtus (1892–1960) hett dĂŒsse fidelen Riemels vör knapp hunnert Johr to Papier bröcht. De fienföhlig Biller kaamt vun den Illustrator Fritz Koch-Gotha (1877–1956). Över twee Millionen Böker sĂŒnd dorvun över den Ladendisch in de Kinnerstuven rinwannert. Vör teihn Johr hebbt de lĂŒtten Hasenkinner denn ok endli PlattdĂŒĂŒtsch lehrt. Karl-Heinz Groth hett de hochdĂŒĂŒtschen Riemels in’t PlattdĂŒĂŒtsche överdragen. De „LĂŒtthasenschool“ is dorbi rutsuert. Nu beleevt de Hasenkinner Hans un Greten endlich wedder nie'e AventĂŒer op Platt un passend to de Johrstiet heet dat Book: „Winter in de LĂŒtthasenschool“. Dat is wat ganz BesĂŒnneres, denn dĂŒsse Geschicht vun Albert Sixtus is nu eerst opdĂŒkert. Se leeg mit veele anner Verse op’n Dackböhn rĂŒm.

>Titelbild Winter in de LĂŒtthasenschoolFoto: Heike Thode-Scheel
#HochDeutsch

Wenn die kleinen Hasen Weihnachten feiern

Wer kennt sie nicht, die sĂŒĂŸen BĂŒcher "Die HĂ€schenschule"? Der Kinderbuch-Klassiker von Albert Sixtus ist fast 100 Jahre alt. Vor zehn Jahren haben die Hasen Platt von Karl-Heinz Groth gelernt. Er hat die BilderbĂŒcher ĂŒbertragen. Nun gibt es eine neue Geschichte, die lange auf dem Boden eines alten Hauses versteckt war: "Winter in der HĂ€schenschule" - auch auf Platt.

Julia Walther hett nie'e Biller maalt

Leider geev dat dorto keen Biller mehr. Also hett de junge Illustratorin Julia Walther enfach niege maalt – ganz so, as wi dat vun fröher kennt. Un jĂŒst so leeftalig as de Originolbiller vun Fritz Koch-Gotha. Aver doch noch en beten söter un moderner. För allen Dingen de Schoolmeister is nu gor nich mehr so scharp antosehn:

„Morrn Kinner, fangt de Ferien an,
 denn Knecht Ruppert löppt nu weer
 dörch den  Hasenwoold verdweer . . .“

röppt he in’e Hasenschool. Un denn geiht dat heißa in’t Winter-Vergnögen rin. Eerst Mol to’n Sledenfohrn in‘ Winterwoold. Un denn kleevt Hasengretel in’e Köök Christboomsteern tosamen un Hasenhansel maakt all de Nööt gĂŒllen. Nu is Wiehnachten nich mehr wiet.

Af in't Hasen-Winter-Wunnerland!

Karl-Heinz Groth nimmt uns mit op en Reis dörch dat Hasen-Winter-Wunnerland. Wo de KerzenlĂŒcht in de Nacht blenkert, de Steerns in gĂŒllen Pracht hell lĂŒchten un denn eerst de „glinstern Lichterboom“ . . . Wo schön klingt doch de plattdĂŒĂŒtschen Verse. Dor kĂŒmmt en so recht in Wiehnachtsstimmen. Annern Morrn is natĂŒrli Äkschen in‘ Winterwoold. Dor suust de beiden Hasenkinner op ehr niege Holtskier den Barg rĂŒnner. Un glööv man nich, dat se en Sneemann buut. Ne, natĂŒrli buut de beiden en Snee-Haas:

„Hier en Tappen för de Gummel,
 för Mund un Ogen Kerzenstummel,
op den Kopp twee rode Wuddeln,
fardig is he -recht to’n Knuddeln.“

  Tja, aver jichtenswann sĂŒnd denn de Wiehnachts-Ferien ok to Enn. Aver de LĂŒtten mööt nich trurig ween, denn:

„Blots noch veerteihn Weken lang,
 mööt drĂŒcken jĂŒm de Hasenbank,
 un denn is Oosterdag. Hurra . . .“

 juchheit de Hasenkinner. Un wat kĂŒmmt denn? Na, is doch kloor:

Jedeen Hasenkind vun’t Land,
nimmt en Pinsel in de Hand,
farvt de Eier, witt un rund,
mit’e schönsten Farven bunt.“

Winter in de LĂŒtthasenschool
Albert Sixtus, Platt vun Karl-Heinz Groth
Husum Verlag
Bestellnummer ISBN 978 3 967 170 5
12,95 Euro

Innenseite aus dem Buch Winter in de LĂŒtthasenschool

So sĂŒht dat niege Book vun de lĂŒtten Hasen binnenin ut.

Autor der LĂŒtthasenschool Albert Sixtus

Albert Sixtus hett de söten Geschichten för sien Söhn schreven.

Text / Fotos: Heike Thode-Scheel / Heike Thode-Scheel, Thienemann Verlag
PlattdĂŒĂŒtsch Zentrum / Zentrum fĂŒr Niederdeutsch
Landesdeel Schleswig
Wi möögt Cookies
Cookies maken uns dat Anbeden vun unsen Deenst lichter. Wenn Se op unse Siet ünnerwegens sind, bedüüdt dat, dat Se dor nix gegen hebbt, dat wi Cookies bruken. Hier gifft dat dorto mehr to weten...