Wenn dat Peerd an‘n Heerd steiht... Audio
„Fru Tarantula danzt geern Hula, denn Rock’n Roll geiht nich so dull. De velen Fööt kaamt in de Mööt. Un gor nich fuul, fallt se op’t Muul. Dorüm danzt Hula, Fru Tarantula“, riemelt Schrieversfru Bärbel Wolfmeier in ehr nie‘es Book „Lyrik för Lütte“. Un kloor danzt de söte Spinnenfru mit de velen Been ok in’t Book Hula över de Siet. Denn de Autorin vun de Sleswigsche Geest kann nich blots riemeln, se kann ok teken. Un hett ok sünst noch allerlei Saken, de se goot lieden kann: Rieden, Platt snacken, sik üm ehren Diekschoop-Verlag kümmern, singen, Poetry-Slammen, mit ehren lütten Enkel Mäxchen spelen: „All’ns mien Begeistern“, smüüstert se in unsen Snack, „un ik heff eenfach Lust, nich blots för mi sülven wat to maken, sünnern ok för anner Lüüd.“ Dorbi is dat Book mit Riemels för Lütt un Groot rutsuert – mit Gedichte vun ganz verscheden Lüüd ut ganz verscheden plattdüütsche Ecken. Dor hebbt Schoolklassen mitmaakt, bekannte Dichterslüüd, Plattsnacker, Fruunslüüd un Mannslüüd. Also en bunte Mischen vun all’ns. Op Hoch un op Platt.
Jede Gedicht in dat Book gifft dat op Platt- un Hochdüütsch un mit en Bild dorto.Tierische Lyrik auf Platt für Klein und Groß
„Lyrik för Lütte“ heißt das neue Kinderbuch von Bärbel Wolfmeier. Die Plattschnackerin von der Schleswigschen Geest hat kleine plattdeutsche Gedichte von ganz verschiedenen Autorinnen und Autoren gesammelt – aus ganz verschiedenen plattdeutschen Ecken. Es sind bekannte Autoren dabei, Schulkinder, Schulklassen, Leute, die einfach Spaß am Schreiben haben und natürlich Bärbel Wolfmeier selbst. Sie reimt nicht nur im Buch, sie hat auch zu jedem Gedicht ein passendes Bild gezeichnet. So wird aus jedem Gedicht eine kleine Geschichte. Alle Gedichte drehen sich um die Tiere – und sind im Stil von Joachim Ringelnatz oder Heinz Erhardt verfasst. Klein, aber oho – zum Amüsieren, zum Nachdenken und auch zum Erzählen. Auf Hochdeutsch – und auf Plattdeutsch. Da ist für jeden etwas dabei.
Hier kümmt all’ns tosamen: Poesie, Platt un Märken
„Nu heff ik all dat, wat ik in de Literatur op’t meiste leev heff, tosamen bröcht: Poesie, Platt un Märken. Denn jede Riemel is jüst dat: En lütte Geschicht vull Fantasie“, so Bärbel Wolfmeier. Veel Fantasie steekt förwiss in dat Book binnen. De lütten Riemels kann een sik vörlesen laten oder sülven studeren. Un dor hebbt Lütte un Grote Spaaß an. De sünd so’n beten in de Traditschoon vun Joachim Ringelnatz un Heinz Erhardt. Op jeden Fall: Tierisch goot, düsse „tierischen Gedichte“. Denn in dat Book dreiht sik all’ns üm de Deerten. Aver wie finnt een denn nu de passen Dichterslüüd? „Eerstmol heff ik en Utschrieven maakt op mien Websiet un bi facebook. En poor heff ik persönlich ansnackt un Gesa Retzlaff vun’t Plattzentrum in Leck hett dat de Modellscholen tostüert. Dree Schoolklassen sünd dor mit en Bidrag binnen, vertellt de Plattsnackerin.
Lang nadenken? Nich ehr Ding. „Ik bün en Abenteurerin.“
Lang nadacht hett se nich över dat ganze Projekt: „Ik gah los un överlegg mi nich, wat kann wull scheef gahn – ik fang eerstmol an to gahn. Un wenn denn en Problem kümmt, denn pack ik dat Problem an un denn gah ik wieder. So bün ik. Ik spring glieks in’t kole Water.“ Jüst so is ehr dat ok mit ehr anner Kinner-Böker gahn. Üm de ünner de Lüüd to bringen, hett se mal kort en egen Verlag grünnt mit den Naam „diekschoop-verlag“. „Ik bün en Abenteurerin“, lacht se. Dat kann een ok in ehr Riemels un Biller marken. In ehr nie‘es Book steiht dat Peerd an‘n Heerd, de Hunnen blafft op Platt, de Deerten fiert in‘n Goorn en Party, de Heister sleit Koppheister un de Satanszickjes maakt blots Kreihenschiet.
Man mutt ok mol üm de Eck denken
De Lütten köönt sik amüseren, de Groten köönt mal sinneren: „Man mutt ok mal üm de Eck denken“, seggt Bärbel Wolfmeier, „aver dor sünd jo överall Biller binnen, de hölpt de Lütten, dat to verstahn.“ De Biller hett se sülven tekent. Mit Kunst is se eerst vunwegen ehr Böker anfungen: „Ik heff fröher nienich maalt. För mien eerste Book „Lütte Bagaluten“ heff ik jo noch en echte Illustratorin fraagt. Aver dat is to düür för so en lütte Oplaag. Dor heff ik anfungen, sülven to malen, heff mi Böker köfft un rümprobeert. Sülvst is de Fru!“
För Mäxchen, dormit Plattdüütsch sien Grootmudderspraak warrt
Un dorop is se stolt. All’ns in Egenregie maakt. För all de lütten un groten Plattsnacker. Aver vör allen Dingen för en lütt Bagaluut: „För Mäxchen, mien eersten Enkel, dormit Plattdüütsch sien Grootmudderspraak warrt“.
Lyrik för Lütte, Tierische Gedichte op Platt
Bärbel Wolfmeier
Diekschoop-Verlag
ISBN 978-3-9859523-6-6
Op de Siet vun Bärbel Wolfmeier un ehren Diekschoop-Verlag gifft dat Indrücke vun de Bookpräsentatschoon, de wat an de 30. September 2022 in de Kulturstiftung in Schleswig weer.