platt.best - Drift vun Harten

Drift vun Harten

Logo Platt Best 01

Mit Hummel Hilde op Tour dör Hamborg Audio

„De dicke Hummel Hildegard, mag Blöten geern - bunt, week un zoort .  . . Ach, wat is dat för en Leven! Tscha. So is dat bi de Hummels even . . .!“ De lütt Plüschmors is överall in Hamborg togang. Op’n Dom, mol eben Bruus drinken un Slickerkraam naschen, bi Planten un Blomen an de Blöden rüken un fröhmorrns en köhliges Bad in’e Alster nehmen. Hilde nimmt de Kinner (un de Groten) mit op Tour dörch Hamborg. Dor is se nämli tohuus. Un wat dor all’ns los is, dat will se de Kinner wiesen. Mol op Hoch- un mol op Plattdüütsch.

Aufgeschlagene Doppelseite aus dem Buch "Hummel Hilde" mit Stiften.So süht dat Mitmalbook vun binnen ut.
#HochDeutsch

Ein Mitmalbuch auf Platt und Hochdeutsch

Hilde ist eine Hummel, die Plattdeutsch spricht. Mit ihr unterwegs in Hamburg lernen kleine Leserinnen und Leser nicht nur viele Orte und Schnacks kennen, sondern können das Buch auch selbst mitgestalten. Dazu geben die kindlich-lustigen Illustrationen von Nele Palmtag vielfältige Anregung, und die plattdeutsche Sprache lernt sich beim Mit- und Weitermalen ganz nebenbei. Nämlich so: Zuerst wird die Geschichte einmal laut op Platt vorgelesen, was sehr lustig klingt, wenn man es zum ersten Mal hört oder liest. Beim Mitgestalten der Bilder wird dann die Beschäftigung mit der Sprache vertieft, und die kleinen Künstlerinnen und Künstler können, u.a. mithilfe eines Glossars und Hinweisen zur Aussprache, schauen, was sie schon verstanden haben. Erst ganz zum Schluss wird die Geschichte dann noch mal auf Hochdeutsch gelesen und das eigene Bilderbuch vollendet.

De Lütten dörvt sogor in dat Book rinmalen un mitmaken bi de Geschicht

Dat künnt de Kinner sülven lesen oder sik vörlesen laten. Aver dat Schönste kümmt noch: De Kinner dörvt in dat Book vun Hummel Hilde rinmalen. Nee, se mööt dat sogor. Denn de feinen kinnerlichten Biller vun Nele Palmtag sünd blots halv trecht. Mankeen Mal fehlt en poor Delen. Oder de Lütten mööt de Biller to Enn anpöönen. Aver se schüllt ok sülven wat dorto teken: To’n Bispill de bunten Blomen oder op’n Dom all den Slickerkraam. Dat Schipp mööt de Kinner sülvst beladen un ok de dicke Hummel Hilde mutt noch ehrn dicken Buuk kriegen. Oder de Michel: De süht noch ganz swatt-witt ut. So köönt de Kinner de Stadt Hamborg entdecken, köönt de Geschicht mitgestalten un vör allen Dingen kriegt se en Stück Plattdüütsch mit.

„Ik will, datt Plattdüütsch wedder in‘n Alldag vun’e Kinner rinkümmt“

Dat seggt Wiebke Colmorgen. De Plattschnackerin ut Lüttenborg in Sleswig-Holsteen hett sik de söte Geschicht vun Hummel Hilde utdacht. Nu is se twoors in de Grootstadt Hamborg tohuus, aver ehr Kinnertiet op’n Buernhoff, de hett se nich vergeten. Un ok nich ehr Moderspraak Platt. Wiebke Colmorgen maakt nämli Spraakfördern in‘n Kinnergoorn un dorbi kriggt se en Barg mit „woans Kinner Spraak lehrt un wo wichtig dat is, dat en sien egen Moderspraak wertschätzen deit.“ Dorbi geiht dat nu nich blots üm Platt – bi ehr in‘n Kinnergoorn schnackt de Lütten ok Türkisch oder Russisch oder Franzöösch.

Dat Mischmasch twüschen Hoch un Platt hölpt de Kinner

För Wiebke Colmorgen is dat mit de verscheden Spraken ganz eenfach: „DeKinner hebbt ehr Spraak, ik heff mien Moderspraak un gemeensam hebbt wi Hochdüütsch.“ Platt is för ehr as so’n Brüch twüschen all de Spraken.  Un dat kümmt denn ganz vun alleen rut. Düt Mischmasch twüschen Hoch un Platt, dat hett se ok in dat Book över Hummel Hilde rinbröcht. So geiht dat mit dat Platt lehren doch en beten wat eenfacher: Toeerst schöllt de Kinner de Geschicht op Platt lesen oder sik vörlesen laten – üm so’n lütt beten Spraakgeföhl to kriegen.

Mit de Biller kaamt ok de plattdüütschen Begriffe in‘n Kopp rin

Denn köönt se sik de Biller en beten wat genauer ankieken un köönt dorto all de Wöör öven. Un wenn dat mol allto swoor is, gifft dat achtern in’t Book en Oort Vokabellist to’n Nakieken. So lehrt Groot un Lütt peu á peu Plattdüütsch. Un wat köönt se to’n Sluss stolt ween, wenn se ehr egen Billerbook trecht hebbt un Oma oder Opa wiesen köönt. Un villicht köönt se Opa un Oma denn ok de Geschicht vun de dicke Hummel Hilde op Platt vertellen. Mit ehr egen Biller.

„Hummel Hilde“, eine Hamburger Mitmal-Geschichte op Platt und Hochdeutsch, Wiebke Colmorgen, Junius-Verlag, ISBN 978-3-96060-552-2, 7,90 €

Text / Fotos: Heike Thode-Scheel
Plattdüütsch Zentrum / Zentrum für Niederdeutsch
Landesdeel Schleswig
Wi möögt Cookies
Cookies maken uns dat Anbeden vun unsen Deenst lichter. Wenn Se op unse Siet ünnerwegens sind, bedüüdt dat, dat Se dor nix gegen hebbt, dat wi Cookies bruken. Hier gifft dat dorto mehr to weten...