Stell di bidde kort vör:

Ik wahn siet 2016 in Flensborg-Weiche/Goornstadt. Boorn un opwussen bün ik in Quern (Angeln) un dor heff ik ok vele Johrteihnten leevt. Siet 2005 bün ik in’n Rohstand, vördem harr ik lange Tieden mit Kommunalverwaltung to doon. Ik bün verheiratet un heff en grote Familie, ok all Urenkel. Huus- un Hoffarbeit un Handwark maak ik geern, ok mal verreisen un dat an‘n leevsten mit de Wohnwaag.

Wat bedüüt di de plattdüütsche Spraak?

As ik 1948 to School keem – na de Volksschool in Kalleby, kunn ik blots Plattdüütsch.
Dat Hochdüütsch lehren full mi bannig swoor un hett mi över veele Johren utbremst. Platt is sodennig mien Moderspraak, aver Plattdüütsch schrieven heff ik eerst vör rd. 8 Johren lehrt. Platt in’e Familie warrt wenig snackt, mit de jungen Lüüd gor nich.

Wo kriggst du hüüt noch Plattdüütsch mit?

Dat gifft en ganze Reeg vun Lüüd ut Berufstieden un Arbeit in de Gemeeden, mien beide Bröders un ok ne’e Navers in de Goornstadt mit de Platt snackt warrt. Af un an geiht dat ok mal to plattdüütsche Theoter.

Wie hest du de Fördervereen kennenlehrt?

Dormit Plattdüütsch in Angeln nich ganz utstarven deit, heff ik mi af 2013 als Baas vun de Plattdüütsch-AG in de Heimatvereen Angeln dorföör insett, dat wat daan warrt för Platt. Dorbi keem mi de Blick op de Fördervereen un een vun de Vörstandslittmaaten sloog mir vör, dor mittomaken. Dat güng 2014 los un sodennig kann ik dor ok wat doon för Plattdüütsch in‘e Landsdeel Sleswig. Vun wegen mien berufliche Achtergrund kann ik dor wat för Formales un för rechtliche Saken doon un mit an Strukturn för de Vereen arbeiden.

Wat wünscht du di för de plattdüütsche Spraak?

De plattdüütsche Spraak mutt för junge Lüüd intressanter warrn. Spraak un Schrift schall ‚frisch‘ röverkamen, dormit dat nich de Indruck maakt, dat is allens vun gestern. Besünners in de östliche Landsdeelen mutt dor veel daan warrn, sunst fallt Plattdüütsch dor ganz achtern rünner.

In’t Plattdüütsch-Zentrum warrn veel Seminaren un Kursen mit en grote Spektrum anbaden. Dor is wat dorbi för Kinnergoorns, Scholen un ok för Erwussnen, de as Multiplikator ünnerwegens sünd. Stütt warrt ok de Arbeit an Scholen, de an’t Modellprojekt "Friewillig Plattdüütschünnerricht“ deelnehmen.

Mitmischen will ik bi de Vereen geern noch en Tiet lang.

Hest du en plattdüütschen „Lieblingsminschen“?

To plattdüütsche „Lieblingsminschen“ fallt mi foorts mien Vadder in, ok wenn he all siet veele Johren doot is. Bi Dichters, Schrievers, Politikers un sünst noch wat gifft dat opstunns keen, bi de dat Plattdüütsche un Lieblingsminsch tosamen passt.